طب و بعدين ...
بصوا لأول مرة مش حلتزم بنسق الكتابة باللغة العربية الفصحى لأنى تعبت نفسيا من الكتابة بيها و بحس إنى مش بتكلم من جوايا , مبدأيا كدا فى إعتراف اللى هو إنى فشلت لمدة 4 أيام إنى أكتب مقال أو تدوينة عن ال 4 المعتقلين فى الغربانيات من يوم 20 يناير لحد دلوقتى ؛ على فكرة الفشل دا كان نتيجة إنى كل م أكتب المقدمة و أجى أتكلم على واحد واحد بلاقى صور الأربعة قدامى ف مش بعرف أكتم دموعى لإحساسى بالعجز إنى أعمل حاجة بجد مؤمن إنها تطلعهم .
حبدأ بقا كمودى أتكلم هنا عن 4 من الشباب اللى أى حد يتشرف إنه بس قعد معاهم مرة .. سواء كأصدقاء أو كرفاق أو كأناركيين بيسمع منهم الفكرة .
ملحوظة / الترتيب على أساس معرفتى بالرفاق (( ترتيب زمنى )) مش على أساس تانى علشان محدش يصطاد فى الميه الوسخة .
محمد حسين عز الدين عواد ... طالب فى كلية علوم , اتعرفت عليه على تويتر و قابلته أول مرة مع اللى بقى صديقنا (( مارك المظفر )) فى مسيرة كانت ضد المجلس السمكرى , و سيبنا المسيرة لما الناس بدأت تهرتل و تهتف (( الجيش المصرى بتاعنا .. المجلس مش تبعنا )) إتضايقنا علشان الإيحاء اللى فى الهتاف (( ضحكة رقيعة كبيرة )) و مشينا و دى كانت أول مرة مع عز و بعدها انخرطنا شوية مع بعض لحد م وصلنا إن تقريبا 85% من تفاصيل حياتى مع عز , و بعدين حصلت مشاكل و اختفيت و الوحيد اللى كان بيسأل عليا وقتها هو عز :-) و كانت حاجة فاشخانى انبساط أصلا , مقدرش أنكر إننا كنا بنشد كتير بس بعدها بدقيقة بنبقى بنضحك معرفش دا جنان ولا عدينا مرحلة الرفاق ولا إيه بالظبط بجد عز أكتر من أخ وصديق كفاية إنه رفيق درب , طيب جدع هايبر أكتيف مثقف على قدر كويس من العلم ,و أخيرا قلب أسد بمعنى الكلمة .
أمير أسعد ... خريج كلية علوم , اتعرفت عليه على الفيس بوك برضه من فترة مش طويلة , و أول مرة اتقابلنا فرحت فشخ من كتر م بسمع كلام عليه و على جدعنته , المرة دى كانت قصاد محكمة محرم بك فى وقفة تضامنة مع عمال شكرة الإسكندرية للحاويات المحكوم عليهم ب 3 سنين :-) , و كان بجد اليوم دا بداية صداقة قوية مع أمير .
بعدها بقا بدأنا نهرى شوية فى كل حاجة نظرية تطور , نشأة الإنسان , أناركية , شيوعية , كل ما يتخيله عقل بشر اتكلمنا فيه يا بشر , تصوروا فى فترة معدتش أسبوع بقينا تقريبا عارفين كل حاجة عن بعض , و بصراحة من الناس اللى كانت متضامنة معايا ضد حط عز عليا سواء فى القلش أو غيره (( ايموشن واحد مطلع لسانه )) , و بعدين دلوقتى هو باعنى لأنه كان المفروض حينزلى اللينيكس علشان أوبن سورس و الكلام دا كان يوم 22 يناير , بس هو راح قعد على التجارية هو و الرجالة و هوب باعنى و مجاش , بس برضه مستنى منك اللينيكس يا أمير يا أسعد .
أمير / طيب , راجل , صلب , فيلسوف , عالم , مهندس برمجيات جامد و ينفع لو حد عازه فى شغل برضه (( أدى إعلان ببلاش يا عم أهو )) , يلا أدينا مستنيك يا صديقى العزيز .
محمد أحمد البدرى ... طالب فى كلية تربية قسم فلسفة , بصوا أول يوم اتعرفت عليه عن طريق رفيقين من حركة يوتوبيا الشيوعية على مكتب الحركة فى الجامعة , إنسان لذيذ حرك خدوم , أول يوم أعرفه فيه تطوع و وزع جريدة الحركة و بعدين قعدنا نتكلم و بعدها أخدنا أرقام بعض و قعدنا نهرى نهرى نهرى لحد م اليوم خلص و بعد كدا اتكلمنا على الفيس و ظبطنا الدنيا و بقينا ننزل الجامعة مع بعض , و بجد البدرى بقى أخ صغير و قريب منى فى فترة قصية , و برضه حضر وقفات كتير جوه الجامعة و بصراحة بوظنا وقفات كتير للخرفان و البقر جوه الجامعة و خصوصا وقت حرق المقرات لأنهم قالوا اللى قتل إسلام ( الطفل الإخوانى فى دمنهور ) هى ميليشيات البرادعى و حمدين , يومها اتفشخنا ضحك و رحنا حفلنا عليهم دا يوم تاريخى للبدرى .. بعدها بفترة البدرى بقى عضو فى الحركة و بدأ نشاطه يوم 20 يناير و كان أول يوم فى حملة احرقوا دستورهم , و اليوم محصلش لظروف خارجة عن إرادتنا كلنا , و كان بيقولى خليك معانا يا مودى و فكك من البيت و لولا تليفون أمى كان زمانى يا بدرى معاك بنغنى فى نفس الزنزانة .
البدرى / براءة الطفل اللى فيه تكفى كل حاجة قولتها تخليك تعمله أى حاجة , انتمائه للفكرة دا فوق أى حاجة .. حيخرج من الغربانيات حيلقى مفاجأة فى بيتهم , اختك الكبيرة وقفت شتمت السلطة و الحكومة و حلفت لتخليك تنزل ضد النظام , ابسط يا عم تضامن عائلى أهو .
حسين محمد .. الوصف الوحيد (( المطرطش اللى زيى )) , واد مجنون كدا و أول مرة أشتغل معاه كان جرافيتى #احرقوا_دستورهم , إنسان مسخرة بياخد من أبسط ألم فى حياته و يحوله لنكته , إنسان حساس جدا .. على قد الغباوة و الطرطشة و الجنان اللى تشوفوهم فى شخصيته على قد م هو أبيض فشخ من جوه و طيب جدا , و فى نفس الوقت فيه قوة جبل و صلابة مش موجودة فى ناس كتير أوى .. حسين فى ناس كتير بتحبك برة , اطلع و فكر فيهم جنب النضال .. بجد حتطلع تنبسط فشخ , انت عارف انك اخويا الكبير و مفيش أخ كبير بيسيب أخوه الصغير يناضل من غير ولا انت شايف ايه بميتين أم دماغك دى .
بصوا انتوا الأربعة ... مستنيكوا تطلعوا علشان نكمل اللى بدأناه و بنحلم بيه م لازم نشوف اسكندرية أول كوميونة فى مصر مع بعض , شلة يوم 20 يناير دى مينفعش تنضرب أو واحد يبعد ... متنسوش الرفقية و الإخوة اللى بينا يا جدعان
عز , أمير , البدرى , حسين ... كلمة أخير / انتوا الرجالة اللى حتكمل حلم حلمناه سوا , مستنيكوا
عمر السجن م غير فكرة , عمر القهر م أخر بكرة
ملحوظة / أسف لو الكتابة فيها جانب شاعرى (( مشاعر )) أكتر من العقل ، بس أنا بكتب عن إخواتى فى نفس الوقت اللى فيه هما رفاقى .
الحرية لمعتقلين الإسكندرية ... الحرية لرفاقنا
تعليقات
إرسال تعليق